Dalladda waxbarashada gaarka ah ee Soomaaliya oo dooratay Guddoomiye iyo ku-xigeenno cusub

Somalistudents, Muqdisho, Jannaayo 8, 2003

Dalladda waxbarashada gaarka ah ee Soomaaliya ee marka la soo gaabiyo loo yaqaanno FPENS ayaa 6dii Jannaayo magaalada Muqdisho ku qabatay doorashada xilalka Guddoomiyaha iyo ku-xigeennada markii ugu horreysay tan iyo markii dalladdaasi dhidibada loo aasay bishii Jannaayo ee sanadkii 1999kii.

Doorashadaas oo ahayd mid furan oo ay saxaafadda gudaha goob joog ka ahayd ayaa waxaa jagada guddoomiyennimada loogu doortay Mudane Shariif Maxamed C/laahi Xuseen oo isla markaana ah Madaxa Soomaaliya ee Hay’adda Bisha Cas ee Imaaraadka Carabta, iyadoo 57 ka mid ah 63dii qof ee codkooda dhiibatay ugu shubeen guddoomiyaha cusub oo aysan jirin cid la tartantay. Sidoo kale doorashada ku-xigeenka 1aad oo u muuqatay inay ka yara adag tahay tahay tan guddoomiyennimada marka la eego tirada musharixiinta isu soo tagatay jagadaas ayaa waxaa ku-xigeenka 1aad ku guuleystay Mudane Faarax Sheekh C/qaadir, oo xilka ku-xigeenka guddoomiyennimada soo hayay tan iyo markii la aasaasay Dalladda, kadib markuu codkii kaga adkaaday 3 musharrax oo jagadaasi kula tartantay.
Guddoomiyaha cusub ayaa xilka la wareegaya kadib markii Dalladda waxbarashada gaarka ah ay soo shaqeyneysay muddo 3 sano ah, waxaana Gudoomiyihii xilka ka dagay Mudane Axmed C/laahi Sheekh, isla markaana ahaa Madaxa hay’adda Imaamu Shaafici, uu ku guuleystay intuu xilka hayay inuu ku qanciyo dalalka Sudan iyo Yemen inay aqoonsadaan shahaadada dugsiyada Dalladda, iyadoo dalka Sudana u deeq waxbarasho u fidiyay ardeydii ugu badneyd ee Soomaali ah ee mar kaliya dal shisheeye jaamacad ka hesha.
Guddoomiyaha cusub Mudane Shariif Maxamed C/laahi wuxuu ka soo shaqeeyay meelo kala duwan, isagoo xilal kala duwana ka soo qabtay xukumaddii Maxamed Siyaad. Sanadihii ugu dambeeyayna wuxuu ku howlanaa arrimaha daryeelka Soomaalida, iyadoo hay’adda uu madaxda ka yahay ay dalka ka furtay dusgiyo badan oo aasasi illaa sareba leh.
Dalladda FPENS oo ku billaabatay dhowr iyo toban hay’ad waxaa haatan xubno ka ah 31 hay’adood oo arrimaha waxbarashada ka shaqeeya, waxaana haatan diyaar u ah in ay soo ku biiraan illaa 4 hay’adood oo haddii ay ku soo biiraan tirada ka dhigeysa 35 hay’adood. Tirada ardeyda ay hay’adahani gacanta ku hayaan ayaa kor u dhaafeysa illaa 50,000 oo ardey.